گزاسیزتھ
ترجمہ : مقصود ثاقب
ہنگرین کہانی
کالی چُپ
ڈاکٹر،جو لکھدی پئی آں میرے نِکے بھرا دی کتھااے۔۔۔اِک نِکے جِنّے گلابی مُکھڑے والے بال دی کتھا ، جیہدیاں کالیاں اکھاں ہر ویلے کِتے دُور دُراڈے جھاکدیاں رہندیاں سن۔اِک پاتر ہور وی اے۔ایہہ ہے کالی چُپ۔
اوہ اَج بھلک وِچ ای وڈا ہوگیا سی۔پچھلی راتے اوہ اصلوں ای بلونگڑا جیہا سی۔سویر ہوئی تاں اوہ پکا کُھنڈھ بنیا ہویا سی۔ایڈے ایڈے ڈَنڈ ،کھروے سنگھنے وال، تراہ کڈھ دین والیاں لٹ لٹ جگدیاں اکھاں۔
میرا دِل بڑا ای دُکھیا!
ساڈا نِکا جیہا گلاباں والا بغیچا وادُھو گھاہ بُوٹ نال بھریا ہویا سی۔ایہدی چھت دیاں ٹائلاں تے کندھاں دا پلستر اُکھڑیا پیاسی۔
ڈراؤنیاں راتاں آئیاں تے میریاں نِکیاں بھیناں سُتیاں سُتیاں چیکاں مارن لگ پئیاں۔میرے امی،اباجی نے موم بتی جگائی تے پھیر سواہرے ہوئے مُونہواں نال اِک دُوجے نوں تکن لگ پئے۔کجھ سمجھ نہ آئی کیہ پیا ہونداسی تے اگے کیہ ہون والا سی۔
اِک مینوں پتا سی ،بس مینوں۔
پچھلے جمعے رچرڈ مُوڑھ نے بغیچے دے بوٹے پٹ چھڈے تے ایہناں دی مَٹھی مَٹھی اگ اُتے انیکو کیاں دی چِٹی بِلی بُھن سٹیوس۔نکی جیہی جان تکلیف نال تڑفدی رہ گئی۔
اوہدا کُولا گلابی ماس سڑ کے کوئلہ ہوگیا۔
رچرڈ اُچی اُچی ٹھہاکے مار کے ہسدا پریرے ہویا تاں اساں ہال پاہریا گھت دِتی۔ اوسے رات اوہنے یہودی دی ہٹی بھن لئی۔گلّے وچ کجھ نہ چھڈیا تے گلی وچ پیسے کھلار دا نس گیا۔
اگلی سویرے اساں سُتّے پئے دے ویکھیا،اوہدے ہتھ دی تلی وِچ گولی وَجی ہوئی سی۔ایہہ گولی اوہدا پچھا کردیاں پُلیسے نے ماری سی۔منجی کول گوڈیاں پرنے بہہ کے ماں نے اوہدا وگیا لہو دھوتا۔رچرڈ گھوک سُتّا رہیا۔
کِنّا بد ہوگیا سی اوہ۔گلابی مُکھڑے والے بھولے جیہے بال نوں چیتے کرکرکے اسیں بڑا ای روئے۔اجے انھی کالی بولی چُپ نے وی آؤنا سی۔آای جاوے، اسیں کاہلے پَے گئے۔
اِک واری اباجی اوہدے نال بڑے تتے ہوئے،’’دفع ہوجا،اسیں تیری شکل نہیں ویکھنی۔‘‘اوہنے کوئی لفظ بولن دی تھاں اگوں سارا گوشت چک لیا تے اوہناں دے ویہندیاں ویہندیاں چٹم کرگیا۔ابا جی نے میری امی وَل تکیا تے دوواں دے اتھرو نِکل آئے۔اباجی دا رنگ پِیلا بُھوک ہوگیا سی تے اوہ رچرڈ توں ڈر دے ہوئے کنبدے پئے سن۔
میتھوں ایہہ سبھ کجھ نہ جریا گیا تے میں رچرڈ دے ہتھیں پَے گئی۔اوہنے مینوں کندھ نال دھکا ماریا تے دوڑ گیا۔
میں تاپ چ آپنے بسترے تے پئی ساں۔بے عزتی ہون داغبار جیہا میرے سِر نوں چڑھیا ہویا سی۔ادھی رات نوں اوہ باری دا شیشا بھن کے اندر آیا،’’اوورسئیر دے گھر نوں اگ لا آیاں میں،سَوں لوے ہُن اوہدی کُڑی ،چِٹے دودھ بسترے تے نِسّل ہوکے۔
’’چھیتی ای اگ دیاں لنباں بسترے نوں گھیر لینا اے۔اُبھڑواہے جاگے گی۔رتی سُوہی اگ اوہدیاں چِٹیاں ٹنگاں ساڑ کے کالیاں کردیوے گی۔اوہدے سِر دے وال وی سڑ جان گے تے اوہ گنجی ہوجائے گی۔گنجی!اوورسئیر سی مجاجاں پِٹّی کُڑی۔۔۔گنجی پاپن بن گئی ہووئے گی۔‘‘
اسیں رچرڈ نوں ڈاکٹر کول لے گئے۔اوہنے جدوں پاگل خانے دے نوکراں نوں آپنے ول ودھدیاں ویکھیا تے اوہ بھج کے اوہناں نوں مارن لگ پیا۔نوکراں اوہنوں جکڑ بند ماریا تے پھیر لوہے دے سریاں نال کُٹن کڈھ ڈڑھے۔رچرڈ دے مُونہوں لہو بھری جھگ دے نال نال بڑی ڈراؤنی چیک نکلی،جیہڑی کئیں مِیلاں تائیں اپڑ گئی۔
اباجی دے نال پاگل خانیوں مُڑدیاں مینوں لگا جیویں گڈی دے ڈبے دیاں نُکراں کُھندراں وچ وی رچرڈ دی چِیک بھری ہووے۔میں کسے شے نوں چُھہندیاں وی ڈر دی ساں پئی اگوں کِتے اوہو چِیک نہ میریاں اُنگلا ں نوں چمبڑ جاوے۔
رات نوں اوہنے پاگل خانے دی باری دے کندلے بھنے تے ہیٹھاں دھرک مارکے گھر نوں نس آیا۔اوہدا متھا پِھسیا ہویا سی،سارا راہ اوہ بھجدا آیا سی۔
۔۔۔تے کالی چُپ وی اوہدے مگرے ای ساڈے گھر آوڑی۔اوہدے نہش تے گِلے کھنب ساڈے گھر تے پسر گئے۔بغیچے وچ پُھل کُرما گئے۔سُتّے ہر جی نوں ڈراؤنے سُفنے دِسن لگ پئے۔منجیاں دے چِیکن تے دردیلے ہؤکیاں دیاں واجاں آون لگ پئیاں۔رچرڈ لوہے دا گیٹ ٹپ کے پباں بھار ٹُردا بغیچے وچوں لنگھیا تے اندر کمرے وچ آں وڑیا۔اسیں دونویں ایتھے ای سوندے ہوندے، ماں-ڈردیاں میتھوں ہِلن وی نہیں سی پیا ہوندا۔اوہ مینوں ویکھے بِناں ہفیا ہویا بسترے اُتے ڈھیری ہوگیا۔
پھیر اوہو کجھ ہویا جیویں کالی چُپ نے متھیا ہویا سی۔اوہ میری ہِک اُتے چڑھ بیٹھی تے میری رت دے اِک اِک تُبکے وِچ چھہہ مار کے بہہ گئی۔میں اُٹھنا چاہیا پر اوہنے مینوں منجی نال جُوڑ دِتا۔ہُن اوہ میرے کناں وچ بھیڑیاں بھیڑیاں کنسواں کرن لگ پئی۔میں آپنی منجی توں اُٹھی۔رسہ لے کے اوہدا پھاہ بنایا تے رچرڈ دی منجی ول گھسرن لگ پئی۔میرے سِر،میرے موڈھیاں اُتے جیوں کسے پہاڑ ای دھر دِتے سن۔میرے گوڈے وجن لگ پئے۔تاں وی اوہ پھاہ رچرڈ دے گل پا ای دتا۔اوہنوں کجھ ہوش نہیں سی۔مینوں پتا سی اوہنے جاگ کے سانوں ساریاں نوں جانون مار دینا سی۔میریاں نِکیاں بھیناں نوں والاں توں پھڑ کے بغیچے وچ دھروئی پِھرنا سی۔میں ان جھک ہوکے اوہنوں پھاہ دین لگ پئی۔اوہنے جاگے بِناں اک ہؤکا جیہا لیا،اک سسکاری جیہی بھری تے اَڈیاں مارن لگ پیا۔اوہدا بھارا وجود میرے ہیٹھاں کڑل کھا گیا ،ایویں ادھے کُو پل لئی تے پھیر ختم۔
میرے کناں وِچ کالی چُپ دا بے واج شُدائی ہاسا اُبھریا۔ٹھنڈا سِیت ڈر میرے لُوں لُوں دھا گیا۔
رچرڈ دا ٹھنڈا وجُود میرے ہتھاں وچ سُنگڑیا پیا سی۔
میں موم بتی جگائی۔اک نِکا جیہا ماڑکُو بال بسترے اُتے لما پیا سی۔اوہدا مُونہہ نِیلا ہو گیا ہویا سی۔گلاب مُکھڑے تے توتلی واج بولن والا میرا نِکا ویر۔اوہدیاں اکھاں دُور کِتے بہت دُور گڈیاں ہوئیاں سن۔
مین کالی چُپ دا اوہ ہاسا مُڑ نہیں سُننا چاہوندی تے نہ رچرڈ دیاں دُور جھاکدیاں اکھاں۔میرا دِل دُکھدا اے۔میرا سنگھ نپیڑیا جاندااے تے مینوں نیندر نہیں پوندی۔اصل وچ ڈاکٹر،میں رات نوں چنگی طرحاں نہیں سَوں سکدی۔
تبصرے
ایک تبصرہ شائع کریں