اوہ چلی گئی

اینتون چیخوف

بھوجن ختم ہویا۔ ڈھڈّ نوں ترپتی دا سکھدائی احساس ہون لگا۔ اباسیاں آؤن لگیاں اتے اکھاں 'چ نیند دی مٹھی خماری تیرن لگی۔ پتی نے سگار جلا لئی اتے اک انگڑائی لے کے سوفے 'تے ادھ لیٹیا ہو گیا۔ پتنی سرھانے بیٹھ گئی۔ دوویں پورن سکھی سن۔ ''کوئی گلّ سناؤ'' - پتی نے اباسی لیندیاں کیہا۔ ''کی گلّ سناواں؟ او، ہاں سچ، کی تسیں سنیٔے-صوفیہ اکرووا نے شادی کر لئی ہے؟ کی ناں ہے اس دا... ہاں، یاد آیا مسٹر ترامب نال۔ کنی بدنامی ہو رہی ہے، اس دی!''''اس وچ بدنامی والی کی گلّ ہے بھلا؟'' پتی نے سرسری پچھیا۔''کیوں؟ اوہ ترامب تاں پورا بدمعاش ہے - بھرشٹاچاری ہے۔ کیہو جیہا بے ایمان چلاک تے بے شرم آدمی ہے اوہ! بھورا بھر وی امان داری نہیں ہے اس وچ۔ بالکل بھرشٹ تے چرترہین۔ پہلاں اوہ کاؤنٹ کول مینیزر سی، اتھے خوب ناجائز کمائی کیتی۔ ہن ریلوے دی نوکری کر رہا ہے، چور کتوں دا۔ اپنی بھین تکّ دا سارا مال متا کھا گیا۔ صاف گلّ ہے کہ اوہ چلاک لٹیرا ہے-لٹیرا۔ ایسے آدمی نال شادی کرنا، اس نال بیوی بن کے رہنا! حیرانی ہندی ہے مینوں صوفیہ 'تے۔ کتھے اوہ بھلی اتے سمجھدار لڑکی اتے کتھے ایہہ بے ایمان بندہ۔ میں ہندی تاں کدے وی اجیہے بندے نال شادی نہ کردی، بھاویں کروڑپتی تے خوبصورت ہی کیوں نہ ہندا۔ میں تاں ایسے آدمی 'تے تھکدی وی نہ۔ ایسے بے ایمان پتی دی تاں میں کلپنا وی نہیں کر سکدی۔''پتنی جوش وچ اٹھ کھڑی ہوئی۔ اس دا چہرہ غصے وچ تم-تماؤن لگیا اتے جوش وچ اوہ کمرے 'چ چہل قدمی کرن لگی۔ اس دیاں اکھاں لال سن۔ جس توں اس دے کتھناں دی سچائی پرتکھ نظر آ رہی سی۔ اوہ مڑ بولن لگی۔ ''ایسا نیچ ہے اوہ ترامب اتے اس توں ہزار گنا مورکھ تے ہوچھیاں ہن اوہ عورتاں جو ایسے بندیاں نال شادی کر لیندیاں ہن۔''''اچھا! توں ہندی تاں یقیناً ہی ایسے بندے نال شادی نہ کردی، پر جے تینوں پتہ لگے کہ میں وی ویسا ہی بھرشٹ ہاں، تاں... ? تاں توں کی کردی؟''''میں! میں تہانوں اسے وقت چھڈّ کے چلی جاندی۔ تہاڈے نال اک پل وی ہور نہ ٹھہردی۔ میں صرف ایماندار آدمی نوں ہی پسند کردی ہاں۔ جیکر مینوں پتہ لگے کہ تسیں اس ترامب نالوں سوواں حصہ وی بے ایمانی کیتی ہے، تاں میں...! تاں میں پلک جھپکدے ہی... تہانوں گڈّ بائے...!''''اچھا ایہہ گلّ ہے؟ ہا-ہا-ہا مینوں نہیں سی پتہ کہ میری بیوی عینی صفائی نال جھوٹھ بول لیندی ہے۔ ''میں کدے جھوٹھ نہیں بولدی۔ تسیں ذرا کوشش تاں کرو بے ایمانی کرن دی... تد دیکھنا۔''''کوشش کس گلّ دی؟ تینوں پتہ ہی ہے، میں تیرے اس ترامب نالوں بہت اگے لنگھیا ہویاں ہاں۔ ترامب... اوہ تاں بچہ ہے، اس کم وچ میرے ساہمنے۔ وچارا نو-سکھیا۔ اکھاں انجھ چوڑیاں کیوں کر رہی ہیں؟ اچھا (کجھ رک کے).... بھلا ایہہ دسّ کہ میری تنخواہ کنی ہے؟''''میرا خیال ہے کہ تنّ ہزار روبل۔''''ہاں!... تے اس ہار دی قیمت کی ہے، جہڑا میں پچھلے ہفتے ہی تیرے لئی خریدیا سی؟ یاد ہے نہ... پورے دو ہزار، ہے نہ اتے کلّ خریدی تیری ڈریس... پنج سو دی۔ پنڈ وچلی آرامگاہ دا خرچ ہے، دو ہزار۔ کلّ تیرے پاپا نے وی میتھوں اک ہزار مانج لئے سی...۔''پر پیارے، ایہہ تاں ایدھر اودھر دے خرچے نے...۔'' پتنی ہلکاہٹ نال بولی۔''پھیر گھوڑے دا خرچ، سائیس دا، ڈاکٹر دا خرچ۔ درزی دا حساب اتے اجے پرسوں ہی توں کھیڈ کھیڈ وچ جہڑا سو روبل ہار گئی سی...؟''پتی نے اپنا دھڑ سوفے توں تھوڑھا اپر اٹھایا اتے سر نوں اک ہتھیلی اتے ٹکاؤندیاں پریوار دی پوری بیلینس شیٹ ہی پڑھ دتی۔ پھیر اٹھ کے لکھن میز کول گیا اتے ثبوت وجوں کجھ کاغذ وی پتنی نوں وکھائی۔ ''ویکھیا ہن شریمتی جی کہ تہاڈا اوہ ترامب کجھ وی نہیں ہے، میرے ساہمنے! میری تلنا وچ اوہ کسے معمولی جیب قطرے توں زیادہ نہیں ہے... گڈّ بائے! جاؤ... ہن اگے توں کدے ایسی چنجھ چرچہ نہ چھیڑنا...!''میری کہانی اتھے ہی سماپت ہندی ہے، پر ہو سکدا ہے پاٹھک پچھن' ''تد کی اوہ سچ مچّ چلی گئی؟ اپنے پتی نوں چھڈّ گئی؟''میرا جواب ہے-''جی ہاں، اوہ بالکل چلی گئی، پر صرف دوجے کمرے وچ سون لئی۔''